L’alcebandiere in Place Libertà e à viert in maniere uficiâl la seconde zornade de Adunade dai Alpins che e culminarà domenie cu la sfilade di miârs di penis neris pes viis di Udin.
Cerimoniis si son fatis li dal Templut inte Loze di San Giovanni e li dal Templi Ossari, dulà che a son tignûts i cuarps di miârs di muarts inte Prime Vuere Mondiâl.
Il moment plui impuartant de matinade al è stât la inaugurazion de citadele dai Alpins intal parc Moretti, dulà che a son esponudis lis dotazions dai Alpins, cimelis e reperts storics, i furniments de Protezion civîl e chês de sanitât. Ae cerimonie a àn partecipât il gjenerâl di cuarp di Armade Ignazio Gamba, comandant des trupis Alpinis, il president nazionâl de Associazion nazionâl alpins Sebastiano Favero, il sindic di Udin Alberto Felice De Toni, l’assessôr regjonâl aes Ativitâts produtivis Sergio Emidio Bini e il prefet di Udin Massimo Marchesiello.
Simpri vuê a buinore e je stade mitude une corone al monument ai muarts de Brigade Alpine Julia ae jentrade dal parc Moretti. (A.D.G.) – 12.05.2023
