“O volìn rapresentâ une istituzion che il so rûl, autonom e disinteressât, al sedi ricognossût tant che riferiment pe societât e che al sedi un volan par contribuî ae cressite civîl, culturâl, economiche e sociâl dal teritori”. Cun chestis peraulis vuê il retôr de Universitât dal Friûl, Roberto Pinton, al à acompagnât la inaugurazion dal an academic 2022-2023, il cuarantesim cuint de sô storie.
La cerimonie, pe prime volte voltade inte lenghe dai segns, si è fate intal auditorium de gnove biblioteche dal pôl sientific tecnologjic dal Ateneu. E à partecipât, a distance, cjapant la peraule, il ministri de Universitât e de ricercje, Anna Maria Bernini. Presint in sale, fra chei altris, ancje il ministri pai rapuarts cul Parlament, Luca Ciriani.
“O stin lavorant par un acès sostignibil al cors di lauree in Medisine e Chirurgjie – al à anunziât il ministri Bernini – basât sul slargjament dal numar di provis, che a deventaran cuatri intai doi agns prime dal acès ae universitât. Ma nol sarà un acès indiscriminât. Cun di plui no sarà plui la part di prove che e rivuarde la culture gjenerâl. O stin invistint su la edilizie universitarie e ancje sui lozaments pai students metint plui risorsis “.
La cerimonie e je stade insiorade, in plui che de relazion dal retôr, dai contribûts dai rapresentants dal cuarp studentesc, Francesca Corte, e dal personâl, Lionello Fabris. Pes istituzions, a son intervignûts, di là dal ministri competent, il president de Regjon, Massimiliano Fedriga, e il sindic di Udin, Pietro Fontanini. La lectio magistralis e je stade tignude dal diretôr sientific de Aleance taliane pal disvilup sostignibil, Enrico Giovannini, intant che la prolusion e je stade pronunziade di Daniele Morandi Bonacossi, docent dal Ateneu furlan. (A.D.G.) – 30.01.2023
