A son stâts screâts vuê di matine i locâi metûts a puest tal liceu sientific Marinelli di Udin in graciis dai lavôrs di adeguament cuintri dai taramots e par sbassâ il consum di energjie che a son costâts 5,7 milions di euros.
I lavôrs a son stâts fats soredut de bande dal istitût che si cjate dilunc vie Leonardo Da Vinci. Il cantîr al jere tacât tal 2022 e par no dâ problemis a students e insegnants, lis lezions si fasevin inte sede provisorie di vie Aspromonte.
Ae cerimonie a jerin presints, di la’ dai docents e dai students, l’assessôr regjonâl aes Infrastruturis Cristina Amirante, il sindic di Udin Alberto Felice De Toni, il diretôr gjenerâl dal Edr di Udin Ida Valent e la dirigjente scolastiche Elisabetta Falasca rivade di pôc. (a.d.g.) – 13.11.2024
