A son passâts 11 agns e il cost al è deventât trê voltis plui alt di chel dal progjet scrit tal principi, ma ae fin il gnûf ospedâl di Pordenon al è stât screât vuê di matine. Si trate di une struture moderne che e podarà rispuindi tal mût miôr aes esigjencis de comunitât: “O ringracii ducj chei che a àn lavorât – al à dit Massimiliano Fedriga, president de Regjon Friûl-Vignesie Julie, presint ancje l’assessôr ae Salût Riccardo Riccardi, il sindic di Pordenon Alberto Parigi e il diretôr gjenerâl de Aziende sanitarie dal Friûl Ocidentâl Giuseppe Tonutti – par dâ a Pordenon un gnûf ospedâl. Il troi nol è stât facil, ma cumò o vin di cjalâ indenant e fâ in mût che la struture e puedi dâ ae int lis miôr garanziis fevelant di servizis sanitaris”.
No je mancjade cualchi polemiche tra Parigi e Debora Serracchiani che, in chê volte, cuant che e jere presidente de Regjon, e veve decidût di no fâ su’ il gnûf ospedâl in Comine. (a.d.g.) – 16.12.2024
