Scuintri frontâl îr tor la une e vincj dopomisdì tra une Honda Civic di chês dopradis di Google Map par fâ lis fotografiis dal teritori e une Fiat Uno che e rivave di chê altre bande dilunc de Sp 52 a Cjistiel di Davian.
Intal fâ une curve, il vuidadôr de Honda al à invadût chê altre corsie cjapant in plen la auto vuidade di un om di 67 agns, che dopo dal bot e je lade a sbati cuintri dal mûr che al cor bande la strade e l’automobilist al è restât blocât dentri, tant che par tirâlu fûr a son rivâts daurman i pompîrs adun cui sanitaris dal 118, che lu àn puartât tal ospedâl di Pordenon.
Il vuidadôr de Google car, un om di 38 agns di Fontanefrede che nol stave lavorant in chel moment, no si è fat nuie, ma cuant che i carabinîrs i àn fat fâ l’alcoltest, a àn scuviert che al jere positîf cun valôrs trê voltis plui alts di chei permetûts. L’om al jere cussì cjoc che adiriture si è metût a urinâ devant dai carabinîrs.
Pal om cjoc in bale patente puartade vie e une denunzie penâl. (a.d.g.) – 14.10.2024
