E sarès la cuistion sul possès di une batarie portatile par ricjariâ i smartphone il motîf dal feriment di un marochin di 31 agns, scurtissât ae panse domenie dopomisdì inte aree verde Italia di Cividât. Dal fat al è acusât un om di 51 agns dal puest, indagât par tentât omicidi e rapine.
Daûr des investigazions, il forest al à svicinât il resident di Cividât acusantlu di vêi cjapât la batarie lassade in cjarie intal bagn dal parc. Di chi la barufe e il scurtissament, segnalât ai carabinîrs sedi di une telefonade al 112, sedi dal stes om che al à contatât i militârs avertintju che intal parc – al à dit in maniere testuâl – al jere sucedût un bordel e si è consegnât lôr cjoc. Il curtìs nol è stât cjatât. Tra i ogjets de vitime, domiciliade a Udin, i carabinîrs a àn cjatât doi pachets di spagnolets plens di marihuana. Il furlan, difindût dal avocat Carlo Serbelloni, al è lât devant dal Gip di Udin Roberta Paviotti e si è avalût de facoltât di no rispuindi. Il Gip al à validât l’arest e disponût la custodie cautelâr in preson. (A.D.G.) – 22.06.2023
