Che il superbonus al ves fat vignî gole a une vore di int che si crôt svelte si saveve, ma ce che al salte fûr ogni dì des investigazions de Vuardie di finance al è di no crodi. I financîrs dal Comant di Triest a àn discuviert une fraude ai dams dal Stât in graciis de creazion di credits di impueste inesistents, creâts cul Bonus pes façadis di 3 milions e 750 mil euros.
Par chest a àn denunziât il titulâr di une imprese termoidrauliche di Triest e altris dodis imprenditôrs che a lavorin in Venit, Lombardie, Piemont, Emilie-Romagne e Calabrie, acusâts di fraude ai dams dal Stât, auto ricicli e par vê tornât a doprâ i bêçs tirâts su’ in maniere ilecite.
Lis investigazions a son tacadis de cession dal credit di une imprese edîl par passe mieç milion di euros che e à insospetît i financîrs. Metûts sot secuestri 4 milions di euros. (a.d.g.) – 19.04.2024
