Plui di sîs mês di investigazion, ancje di là dai confins regjonâi, a àn puartât al secuestri di cinc certificâts di cualificazion professionâl fals e a àn permetût ai agjents de Polizie Locâl de Comunitât di mont de Cjargne di individuâ une vere e proprie rêt specializade. La investigazion e je partide de segnalazion de Portele uniche des Ativitâts Produtivis di Tumieç che e veve cjatât ciertis anomaliis inte documentazion, in aparence dade de Regjon Pulie, presentade pe viertidure di une buteghe di piruchîr inte capitâl cjargnele. Dopo di cualchi control, al è saltât fûr che i atestâts no jerin mai stâts mandâts fûr a pro dal sogjet che al veve fat domande, che invezit ju varès cuistâts in maniere ilecite par un totâl di plui di trê mil euros.
Sot de direzion de Procure de Republiche di Udin, lis investigazions a son stadis slargjadis a Piemont, Emilie-Romagne e Lombardie, puartant ae lûs la esistence di une vere e proprie rêt specializade intal furnî falsis certificazions professionâls, dadis par solit des Regjons o di ents increditâts. (A.D.G.) – 05.04.2023
