Ancjemò lavoradôrs in neri scuvierts intal Friûl Ocidentâl dopo dai ultins controi condots dai Carabinîrs pe Tutele dal Lavôr. In complès a son stadis fatis sanzions aministrativis par plui di 30 mil euros e a son stâts identificâts contribûts no paiâts par plui o mancul 10 mil euros.
A Sacîl al è stât sospindût un ristorant etnic par vê doprât personâl no regolarizât, passant il limit dal 10% dai lavoradôrs impleâts. A Davian e je stade rifilade une sanzion a un bar che al à impleât un banconîr cence regolarizâlu par diviers mês. A Cjasarse une rivendite di prodots artesanâi e je stade sanzionade par vê impleât un lavoradôr risultât clandestin sul teritori talian. A Cordenons une ativitât comerciâl e je stade sanzionade par no vê rispietât lis disposizions in materie di lavôr. Infin, a Pordenon une dite edîl e je stade sanzionade pal personâl cence nissun contrat. (A.D.G) – 19.05.2023
