Plui di 22 chilos di opi a jerin stâts platâts intal dopli fondi de marmite di un Tir iranian, ma a son stâts scuvierts intal puart di Triest intune operazion fate adun di Vuardie di Finance, Polizie di Frontiere e Agjenzie des Doganis e dai Monopolis.
Il secuestri al è stât fat intai dîs passâts, ma la gnove e je stade dade dome vuê dai investigadôrs, che a àn riferît di jessi rivâts ae scuvierte de droghe (pe precision 22,6 chilos) ae fin di une schirie di investigazions e al scambi di informazions che a àn puartât ae decision di controlâ une vore ben il Tir iranian, che al rivave dal puart turc di Pendik.
Al è stât cussì scuviert, inte machine motorie, un dopli font inte marmite dulà che al jere stât platât l’opi. Sedi l’autoarticolât, sedi la droghe a son stâts secuestrâts. Lis investigazions, coordenadis dal Sostitût procuradôr Massimo De Bortoli, a pontin cumò a individuâ lis personis coinvoltis inte vicende. (A.D.G.) – 14.04.2023
