Sgarbi a Udin par visitâ Cjase Cavazzini

Vittorio Sgarbi al à visitât Cjase Cavazzini a Udin. Dopo la sô solite visite a Dieç, il sotsegretari ae Culture al è vignût lunis dopomisdì a viodi la mostre “Insieme”, simpri inmaneade dal comitât San Floriano. Insiemi a lui l’assessôr comunâl ae Culture, Federico Pirone. Par il critic, la sielte e je “cetant origjinâl, complementâr a chê di Dieç, ma cuntune tematiche plui curiose, parcè che e presente oparis pôc cognossudis, intant che dispès lis mostris a fasin viodi simpri lis stessis robis”. Sgarbi al à volût visitâ ancje lis colezions permanentis di Cjase Cavazzini, in particolâr la Astaldi e chê dai Basaldella. “Chest al è un museu di prin plan e ogni volte che o torni, o resti simpri plui maraveât”, al à zontât. (A.I.) – 23.05.2023