La Procure de Republiche di Udin e à notificât vuê la sieradure des investigazions ai avocats che a difindin lis cuatri personis indagadis pe muart dai trê fantats, ai 31 di Mai dal 2024, intal flum Nadison a Premariâs.
Indagâts i trê vigjii dal fûc Andrea Lavia di 60 agns di Feagne, Luca Mauro di 49 agns di Tisane e Enrico Signor di 58 agns di Udin, ducj i trê in servizi inte sale operative dal comant provinciâl dai Vigjii dal Fûc di Udin dilunc des dramatichis operazions di salvament no lât a bon fin dai trê zovins; il cuart indagât al è Michele Nonino di 40 agns, infermîr di S. Zuan dal Nadison, che al jere in servizi tal stes moment li de centrâl Sores di Palme.
Inte tragjedie a jerin muarts Patrizia Cormos, Bianca Doros e Cristian Molnar, ducj i trê rumens. (a.d.g.) – 31.01.2025
