Siet agns dopo il maçalizi di Giulio, a Flumisel marcje pe justizie

Giulio Regeni al è sparît dal Cairo, in Egjit, ai 25 di Zenâr dal 2016. Il so cuarp al è stât cjatât sassinât, cun segns di torture, ai 3 di Fevrâr dal 2016 sul ôr de autostrade “Il Cairo – Alessandria”. Di chê dì, la famee Regeni e cîr e e domande veretât e justizie. Miercus ai 25 di Zenâr, intal setim aniversari de sô sparizion, e je previodude une serie di iniziativis a Flumisel par onorâ Giulio e i valôrs di libertât, dirits umans e rispiet des diferencis culturâls, interpretant il sintiment comun di rispiet e di vicinance ai siei familiârs. Il program de zornade al tache za di matine intes scuelis; aes 6.15 dopomisdì e scomence la Cjaminade dai dirits, che e rivarà al Plaçâl dai Teis dulà che, aes 7.41, si tignarà une Fogolade cidine cuntun minût di racueiment. Des 8.15 in Sale Bison, une vore di ospits cun Paola e Claudio Regeni – Massimo Carlotto, Ascanio Celestini, Roberto Fico, Carlo Lucarelli, Marco Paolini, Pif – e une schirie di altris. (A.I.) – 24.01.2023