A son dâts bogns chei dal 2024 su la rivade di visitadôrs tal sît Unesco di Aquilee, pandûts dilunc de presentazion dal belanç dal 2024 presints ancje l’assessôr regjonâl ae Culture Mario Anzil, il sindic di Aquilee Emanuele Zorino, il president de Fondazione Aquileia Roberto Corciulo, la diretore dal Museu archeologjic nazionâl Marta Novello, il diretôr de basiliche Andrea Bellavite e chel de Fondazione Aquileia Cristiano Tiussi.
Chei rivâts inte citât imperiâl a son stâts il 2% in plui a pet dal an prime cun 264.977 biliets dâts fûr, intant che a son stâts 476.647 i passaçs regjistrâts intai portâi des areis archeologjichis a jentrade libare. Plui di 150 mil chei rivâts intes struturis ricetivis e plui di 100 i events proponûts. (a.d.g.) – 28.01.2025
