In citât a cressin lis barufis che a àn dispès, tant che protagoniscj, zovins forescj no acompagnâts e il sindic di Udin Alberto Felice De Toni al sigure che al è daûr a fâ dut il pussibil par frontâ il probleme: “O vin la plene cussience dai problemis di sigurece denunziâts dai citadins. O stin fasint dut il pussibil cui struments che une aministrazion publiche e à a disposizion: miercus o varìn un gnûf incuintri cun Prefet e Fuarcis dal ordin par vê un inzornament e agjî di consecuence”.
“Tant che sindic de citât, adun cu la Zonte o ai dât atenzion simpri massime al teme sigurece – al à precisât De Toni – intal rispiet di rûi e des competencis e simpri cu la fiducie massime viers Prefeture e Fuarcis dal ordin, che ur tocje il compit di garantî l’ordin public. Di bande nestre – al continue il prin citadin di Udin – o vin tignût simpri contats cun ducj, par controlâ in maniere fisse la situazion”.
Sui forescj no acompagnâts, “propit par gjestî lis intemperancis di cualchidun di lôr – al à precisât De Toni – o vin revocât la autorizazion ae cooperative che ju ospitave in precedence e o vin tignût alte la atenzion sul probleme, cemût che al à dimostrât l’intervent de Polizie cui arescj resints”.
De Toni al vise che il Comun al reste a disposizion dai citadins par cjapâ sù lis lôr segnalazions midiant la Polizie Locâl. (a.d.g.) – 16.10.23
