Vinars neri pai viazadôrs e i pendolârs che vuê a àn cirût di doprâ il tren par movisi. Par vie dal siopar nazionâl dal personâl Trenitalia convocât des 9 de matine aes 5 dal dopomisdì di Filt-Cgil, Fit-Cisl, Uil Trasporti, Ugl Ferrovieri, Sml Fast Confsal e Orsa Ferrovie a son stâts soprimûts tancj convois, dai regjonâi aes Frecce, ancje in Friûl-Vignesie Julie.
A Triest, tancj turiscj de crosere – soredut forescj – disbarcjâts sul imbarcjadôr julian, si son cjatâts fûr de stazion Centrâl dibant cirint di cjapâ un tren par rivâ a Vignesie.
Di fonts sindicâls al salte fûr che a misdì si son regjistradis pontis di adesion dal 100% intes oficinis e plui o mancul dal 80% tra il personâl intai trens. I dâts uficiâi di Trenitalia – e à fat savê la aziende – a saran fats savê al tiermin de proteste.
Tra i motîfs dal siopar, lis cundizions di lavôr dai dipendents des ditis apaltadoris di puliziis e lis agressions al personâl. (A.D.G.) – 14.04.2023
