Une gnove schirie di atacs informatics tirâts dai piratis di Nonem, che si pense a sedin rus o a pro dai rus, e sta cjapant ancje une vore di sîts dal Friûl-Vignesie Julie. Daspò di chei cuintri dal puart di Triest di chê altre setemane, cuant che a jerin stâts tacâts ancje sîts dai ministeris, inte matine di joibe ai 27 di Fevrâr a son stâts batûts ancje i sistemis de Regjon e ancje chel dal Ordin dai Gjornalistcj dal Friûl-Vignesie Julie, restât fûr linie par une vore di timp.
A visâ dal fat l’assessôr regjonâl al Patrimoni e ai Servizis informatîfs Sebastiano Callari, adun cun Diego Antonini, aministradôr unic di Insiel, la imprese de Regjon che e gjestìs i servizis informatics: “Al è in pîts un atac hacker de bande di piratis informatics che si pense e sedi a pro dai rus. Pal moment no son segnalâts problemis masse impuartants. La situazion e je cun costance sot dal control de Regjon par mieç de Insiel. O vin a ce fâ cuntun atac smicjât par causâ disservizis e no par puartâ vie dâts sensibii”. “I nestris tecnics – al à visât Antonini – a àn lavorât cun dute la premure pussibile par identificâ e blocâ la menace”.
Pôc dopo misdì Insiel e à fat savê cuntun comunicât che il sît de Regjon e chel dal President Fedriga a jerin tornâts in vore. (a.d.g.) – 27.02.2025
