Daspò dai controi fats dai carabinîrs dal nucli dal ispetorât dal lavôr e dai lôr coleghis des compagniis di Tisane e Udin in cinc esercizis publics e in dôs aziendis agriculis, a son stâts cjapâts proviodiments dûrs cun sospensions e multis par plui di 100 mil euros.
Intun ristorant di Reane dal Roiâl i controi a àn scuviert violazions griviis pe sigurece che a costaran plui di nûf mil euros. Sanzions par 11 mil euros invezit intun ristorant di Udin, indulà che ducj i doi i lavoradôrs presints a jerin in neri, intant che intun bar di Muimans nol jere nissun document di valutazion dai risis, fat che al costarà 9 mil euros.
A Codroip, simpri intun ristorant, i militârs a àn scuviert che nol jere stât fat il plan di emergjence e che nol jere stât nomenât il responsabil dal servizi di prevenzion e protezion, cuntune sanzion di 27 mil euros.
Altris 9 mil euros di sanzion a un bar di Buie che al jere ancje chel cence la verifiche de metude a tiere dal implant.
Dôs si diseve lis aziendis agriculis controladis: intune di Prissinins nol jere stât metût a tiere l’implant eletric, a mancjavin la formazion dai dipendents in fat di sigurece, il miedi competent e il control semestrâl dai aparâts cuintri dal fûc, cuntune sanzion di 30 mil euros. Inte seconde aziende, a Sedean, pai stes problemis sanzion di 20 mil euros.
Par dutis chestis ativitâts e je stade decidude la sospension. (a.d.g.) – 16.01.2025
