Intal dopomisdì di martars ai 13 di Dicembar, la Polizia di Stato di Udin e à arestât un citadin talian par detenzion pai fins di spaç di une grande cuantitât di droghe.
Tor lis 3, dilunc di vie Chisimaio, i agjents di une Volante a àn viodût un fantat suntun monopattin eletric che, a pene che ju à viodûts, al à svoltât daurman in vie Misani. Metûts in suspiet de manovre, i poliziots a son rivâts a fermâ il zovin di 22 agns, resident in citât, che al à mostrât daurman grant gnervôs.
Il fantat al à consegnât ai poliziots, cui documents e lis clâfs di cjase, un sacut cuntun gram di marihuana: i agjents a chel pont a àn decidût di fâ un control plui aprofondît. Platâts intune sachete dal gjubot, sot dai bregons e intal spazi de batarie di risierve dal monopattin, a jerin altre marihuana, hashish e 5.015 euros, in biliets.
E je cussì partide une percuisizion domiciliâr: in cjase e jere altre marihuana e, platâts intun contignidôr, 16 grams di cocaine. In dut, di là di bêçs e cocaine, a son stâts secuestrâts 123 grams di marihuana, trê grams di hashish, il monopattin e un smartphone.
Il zovin al è stât arestât pe detenzion ilecite pai fins di spaç di grande cuantitât di sostance narcotiche e acompagnât in preson. Cheste matine, in ocasion de validazion dal arest, il Gip al à disponût i arescj domiciliârs. (A.D.G.) – 16.12.2022
