Pôre tal stadi di Udin domenie bande lis 7.30 sot sere. Al è il vincjesim sest dal secont timp, Udin e Rome a son 1-1 (gol di Pereyra intal prin timp, pate di Lukaku di cjâf, 10 minûts prime) cuant che il difensôr N’Dicka si bute jù di bot, si sente par tiere, si puarte la man al cûr. Lis dôs scuadris si fermin, dut il stadi al sta cidin, a rivin i miedis e la barele par socori il zuiadôr zâl e ros, che al va fûr alçant sù il dêt, cun dut il stadi che i bat lis mans. De Rossi, l’alenadôr de Rome, prime al domande di viodi il zuiadôr e po dopo, dacuardi cul arbitri e cun Cioffi, la partide e ven sospindude. Si zuiarà, no si sa ancjemò cuant, partint dal 37m dal secont timp, cui stes zuiadôrs, e pal Udin a podaressin jessi ponts decisîfs par restâ in A. La partide di N’Dicka e je lade indevant invezit tal ospedâl, dulà che al è stât escludût l’infart, ma il zuiadôr al è stât stratignût par dute la gnot par altris controi. Forsit il dolôr al cûr al jere dome colpe di une comedonade cjapade di un zuiadôr dal Udin: e dut intal dì che si memoreave la muart in cjamp di un zuiadôr dal Udin, Piermario Morosini, 12 agns indaûr. (A.I.) – 15.04.2024
85
