Stafete Telethon: un grues assegn di 18 aziendis furlanis

Timp di belançs pe vincjesime cuarte Stafete Telethon “24 per un’ora”. Il contadôr des donazions, di fat, si è sierât uficialmentri cu la consegne, inte sede udinese dal Bnl – Bnp Paribas, sponsor principâl dal event, dal maxi assegn di 47.800 euros firmât di un grup di 18 aziendis di chenti, di simpri impegnadis a pro de corse furlane. Sabide ai 3 e domenie ai 4 di Dicembar, cundut de ploie, a jerin stadis 540 lis scuadris in piste, par un totâl di cuasi 15 mil atletis, calcolant ancje i passe 1.500 students de stafete dai zovinis de sabide di matine e i singui coridôrs che a àn partecipât ‘di lontan’, doprant la aplicazion realizade di pueste di 3Technology. La edizion 2022 si è sierade duncje a cuote 235 mil euros, che a son stâts destinâts dal dut ae ricercje sientifiche su lis malatiis gjenetichis raris. (A.I.) – 26.04.2023