Strade comedade a timp di record tra Sapade e S. Stiefin in Cjadovri

E tornarà a vierzi a timps di record la strade regjonâl 355 tra Sapade e S. Stiefin, fiscade di un slac vie pe gnot dongje dal lûc Acquatona. Par cause de instabilitât di un altri slac, invezit, a son previodûts timps plui luncs par tornâ a meti a puest la strade provinciâl 22 e la strade regjonâl 465 interotis dongje dal Riu Blanc intal Cjanâl Pedarç.

“L’obietîf – al à displeât l’assessôr aes Infrastruturis Cristina Amirante – al è meti a puest la viabilitât tra Friûl e Venit dentri di doman. I lavôrs dilunc de strade regjonâl 355 a son finîts, ma tignint cont de alerte pal timp de Protezion civîl, FvgStrade e à vût miôr spietâ fin a doman par tornâ a vierzi la strade”. (a.d.g.) – 07.08.2024