Students e gjenitôrs dal Stringher pronts a lâ in place

Un an indaûr, i students dal Stringher di Udin a jerin lâts in place par domandâ plui sigurece a scuele ma, soredut, il completament dai lavôrs inte gnove sede. Stant che in dodis mês no son rivadis rispuestis, students e gjenitôrs a son pronts par manifestâ di gnûf par fâ valê i propris dirits. In plui, a àn domandât un supuart al assessôr ae istruzion dal Comun di Udin, Loris Michelini, a chel regjonâl Alessia Rosolen e ae Cuesture di Udin. In spiete di une rispueste des Istituzions, l’Edr (Ent di decentrament regjonâl) al à acetât l’invît a partecipâ, ai 15 di Fevrâr, a un incuintri par rispuindi ae domande di sclariments. In bal a son problemis pratics: de costruzion dal cuint lot ae manutenzion, fin a riparazions variis. (A.I.) – 08.02.2023