Intal prin trimestri dal an, il Cuestôr di Triest al à adotât il proviodiment dal Daspo (Divieto di accesso alle manifestazioni sportive) viers di 15 tifôs che, in diviers episodis, a àn tignût condotis che a àn metût in pericul l’ordin e la sigurece publiche.
Tra i destinataris dal proviodiment, a son vot tifôs milaniscj che ai 25 di Otubar passât, in passaç viers la Cravuazie par assisti ae partide di Cope dai campions “Dinamo Zagabria – Milan”, dulinvie di une fermade intal Autogrill di “Duìn Sud”, a àn aprofitât de confusion creade dai centenârs di ultras presints par gjavâ marcjanzie varie pal valôr complessîf di cuasi 2.000 euros. La posizion di chescj ultins e à ancjemò di jessi tignude di cont de Autoritât judiziarie, ma pe turbative al ordin public causade a son deventâts destinataris di Daspo. (A.D.G.) – 19.04.2023
