Vuê di matine a son tacâts i lavôrs par sdrumâ une vore di cjasis malsiguris in vie Ronchi, dongje viâl Trieste. Si trate di un intervent che si spiete di une vore di agns, parcè che chestis cjasis a jerin pardabon malmetudis tant che plui di cualchidune e stave par lâ ju’ di bessole e parcè che la situazion sanitarie e jere simpri plui grivie par cause dal vert, soredut baraçs, cressût in chescj agns.
I lavôrs a tachin propit dal tai dai baraçs, par liberâ dute la zone e metile in sigurece, par po dopo rivâ cui machinaris che a varan di butâ ju’ dut. Cualchi setemane indaûr a vevin za fat intervents par copâ lis pantianis, che a saran fats ancje plui indenant. Si controlarà ancje che no sedin ativis coloniis di gjats o che a sedin altris bestiis. (a.d.g.) – 27.05.2024
