Trement incident vie pe gnot di martars a S. Gotart tor des 10 e mieze, aes puartis di Udin dilunc de strade regjonâl 54, indulà che al è muart l’automobilist che al jere dentri di une Fiat Punto, tamponade di une Renault Megane. Il bot, pôc dopo il puint su la Tor, al è stât cussì fuart che la Fiat si è capotade lant a cjâf in jù denant di une cente dal vivâr Il Giardinetto.
Il vuidadôr de Renault al somee che al vedi bandonât la morose che si jere fate mâl tal puest dal passizîr e al è lât vie a pît, cence nancje controlâ cemût che al stave l’om in chê altre machine.
Sul puest a son rivâts i sanitaris e i Vigjii dal fûc che a àn lavorât une vore a lunc par tirâ fûr de auto il vuidadôr de Fiat, Alberto Rinaldi di 50 agns, che al jere a vivi a Martignà; magari cussì no, l’om puartât di corse tal ospedâl di Udin al è muart pôc dopo. No je invezit in pericul di vite la femine di 32 agns restade feride te auto che e à tamponât. L’om che al causât il bot, resident a Torean, si è presentât dai carabinîrs vuê di buinore. (a.d.g.) – 29.01.2025
