E je in cundizions gravis une persone che, tor lis 2 dal dopomisdì di vuê, in vie delle Caserme, a Pordenon, e je restade cjapade intun incident stradâl par causis in cors di aciertament di bande des fuarcis dal ordin. Intant che e jere in siele ae sô biciclete, si è dade cuintri cuntun furgoncin e e je colade a tiere. I infermîrs de Sores a àn inviât daurman sul puest la ambulance e la machine di emergjence mediche di Pordenon. I sanitaris a àn assistût la persone feride che e je stade traspuartade in codiç ros al ospedâl Sante Marie dai Agnui.
A Cuar di Rosacis, in localitât Quattroventi, si è verificât invezit un incident stradâl che al à cjapât une moto e une veture. Al è sucedût tor lis 3 e mieze dal dopomisdì. I infermîrs de Sores a àn inviât sul puest l’ecuipaç di une ambulance e l’elisocors. I sanitaris a àn assistût la persone che si cjatave in siele ae moto che e je stade traspuartade dopo in codiç zâl al ospedâl Sante Marie de Misericordie di Udin cu la ambulance cun dentri il miedi dal elisocors. La persone e je simpri restade cussiente. (A.D.G.) – 22.02.2023
