6/05/2022 – A son passâts 46 luncs agns di chê sere stofadice dai 6 di Mai dal 1976. Cuarantesîs agns di dolôr, ma ancje di riscuvierte de braùre furlane traviers chê ricostruzion che e je deventade un svant identitari par ducj i furlans.
Il taramot, che di chestis parts si clame ancje Orcolat, si è puartât vie cuasi mil personis e al à distrut intîrs paîs, al à gjavât tant, masse, al popul furlan. Un popul costret a vaî i siei muarts cu la dignitât tipiche di chestis tieris, dulà che la vaiude e je debilece e reagjî al è un imperatîf.
Aes 21 di un 6 di Mai stofadiç in maniere insolite e cjalde, une scjassade di magnitudo 6,4 e à desolât il Friûl cun dute la sô violence, in pôc mancul di un minût, cambiant il cors de nestre storie. Il taramot si à puartât vie 989 vites (chest il dât uficiâl, ma no definitîf), 325 dome a Glemone, e al à provocât 2.607 ferîts.
La zone a Nord di Udin e je stade chê plui distrute. Maian, Buie, Glemone, Vençon, Osôf, Magnan, Dartigne, Colorêt, Tarcint, Forgjarie i comuns plui colpîts de tragjedie. Cjasis sdrumadis, edificis plets de fuarce implacabile dal taramot. E i muarts, tancj muarts, restâts sepulîts tra lis rudinis.
Il taramot, so dispiet, al à dât mût al Friûl di ‘ resurî’ e tornâ a scomençâ, deventant un esempli par dut il mont. La volontât di ricostruî, di tornâ a scomençâ, e je zermoiade, spontanie, ae albe de dì dopo. Il rest e je storie. Storie de nestre int, de nestre regjon, di un Friûl braurôs che al à savût acetâ i aiûts, rivâts di ogni dulà che e di ogni lûc, a testemoneance di un leam speciâl che i furlans a àn savût cressi intal timp cul mont, fuarts ancje de storie di migrazion che e à segnât une vore la nestre regjon. MR
