Teatri regjonâl: passe nûf milions di euros de Zonte

Passe nûf milions di euros pai teatris regjonâi. Daûr de propueste dal assessôr ae Culture Mario Anzil, la Zonte regjonâl e à dât la vie libare a trê diviers proviodiments che a rapresentin “risorsis impuartantis – pal vicegovernadôr – che a permetaran al Friûl-Vignesie Julie di meti a disposizion une ufierte culturâl svariade e di valôr, ancje par frontâ te maniere miôr un dai apontaments plui impuartants dal 2025: l’an dedicât ae Capitâl europeane de Culture che e viodarà protagoniste Gurize cun Nova Gorica”. La part plui impuartante de cifre, 4,88 milions, e je chê destinade an par an par progjets trienâi za beneficiaris dal Fonts unic pal spetacul nazionâl (Fus). Dentri dai 30 di Otubar dal 2024 a son stadis presentadis lis domandis, valutadis di une comission: 3,2 milions (65,57 par cent dal totâl) a son stâts assegnâts al Teatri liric “Verdi” di Triest, 1,3 milions (26,64 par cent) al “Rossetti” di Triest e 380 mil (7,79 par cent) al Teatri stabil sloven. Cun altris 3,15 milions di euros si è proviodût invezit a ripartî i fonts stanziâts a belanç pai progjets trienâi dedicâts ai festival e aes rassegnis dal vîf. Ai festival a son destinâts in dut 1,33 milions, intant che pes stagjons musicâls e i concierts a saran assegnâts 933 mil euros. Cun di plui, pes rassegnis e i concors musicâi a son previodûts aes primis 615 mil e ai seconts 268 mil euros. (A.I.) – 14.01.2025