Tir distrut dal fûc su la A23. Pôre pal pericul che al sclopàs il serbatori di metan

Al podeve vê efiets ben plui grâfs dal bloc de autostrade il fûc al Tir sucedût vuê tor lis 12,15 dilunc il trat di Palme a Udin. Un autoarticolât, alimentât a metan, al à cjapât di fat fûc pôc dopo che l’autist lu veve parcât intune plaçute di fermade, al pâr dopo jessisi acuart de jentrade di fum inte cabine. Lis flamis a àn involucât in curt la cabine e daspò si son slargjadis a dute la cjame, cu la pôre che a podessin verificâsi esplosions fuartis. Imediât l’intervent de polizie stradâl e dai pompîrs, rivâts di Palme cun ben cuatri mieçs . A dâ une man a meti dut in sigurece, ancje une patulie de Guardia di finanza e une dai Carabinieri che a jerin daûr a transitâ in chel moment in autostrade direts a Udin. Il mieç al è lât distrut ad implen; lis operazions di recupar a son stadis fatis za dopomisdì e aes 4 e jere stade tornade a vierzi la corsie di sorpàs. Autovie Venete e à domandât l’intervent di Udin dal Nucli specializât N.b.c.r (nucleâr, biologjic, chimic, radiologjic) dai pompîrs par meti in sigurece i serbatoris dal autoarticolât alimentât a gas naturâl comprès. (ADG) – 15.11.2022