I Financîrs dal Comant Provinciâl di Pordenon a àn secuestrât cinc piçui di cjan, di raze “maltese toy”, a un polac che ju veve puartâts in Italie cence il “passepuart european”, obligatori.
Sabide di gnot, dilunc de “Çumpiel-Secuals”, intal teritori spilimberghês, i militârs a àn cjatât intal baûl dal auto cun targhe polache un traspuartut par animâi scuindût tra chei altris bagais cun dentri i cinc pumars, che par chei l’autist nol è stât bon di mostrâ nissun gjenar di document.
I piçui a jerin disprivâts dai microchips e des certificazions sanitariis relativis aes previodudis vacinis e a jerin traspuartâts di persone cence abilitazion previodude de normative europeane pal traspuart di animâi vîfs. I cjanuts a jerin ancje cence mangjative e aghe e a vevin dome 40 dîs di vite, etât une vore inferiôr a chê previodude de leç pal lôr traspuart.
Il conducent dal veicul al è stât, duncje, denunziât ae Procure de Republiche di Pordenon par maltratament e abandon di animâi e par vê violât la “convenzion europeane pe protezion dai animâi di compagnie”, intant che i cinc piçui maltês a son stâts dâts al Centri “Rifugio del Cane” di Vilote di Cjons. (A.D.G.) – 24.04.2023
