Un citadin austriac di 54 agns al è muart vuê su la mont Mangart. L’om, origjinari di Ossiach, al varès vût di cjatâsi cun doi amîs a Tarvis, li che invezit nol è mai rivât. Daurman a son partidis lis ricercjis di bande de stazion dal Socors Alpin di Rabil, clamade dal centri de Polizie internazionâl di Thörl–Maglern.
La automobil dal om e je stade cjatade daspò cualchi ore dongje dal ripâr che si cjate de bande slovene de mont. Intal prin dopomisdì lis scuadris dal Socors alpin sloven a àn cjatât il cuarp dal alpinist, ae base dal canalon a nord de mont, dongje de ferade che e puarte al troi pal Mangart.
Al è probabil che l’om al stes cjaminant tal canalon cuant che al è colât. Ancje par cause dal maltimp, il recupar dal cuarp al è dificil e al è in cors. (a.d.g.) – 21.05.2024
