A son dams a Gurize par cause de fuarte ploie des ultimis oris, in plui îr a son stâts une vore di inagaments in cetantis stradis. Vuê invezit claps a son rodolâts ju’ sul passadôr pedonâl che al cor in bande dal Lusinç intal parc Piuma, une aree di solit une vore frecuentade di zovins e di fameis.
La situazion dal flum, sedi a Gurize sedi a Gardiscje, e je simpri sot control par vie dal fat che il nivel al sta lant su’ daspò de tante ploie colade.
Al è pussibil che al sedi simpri il tristimp la cause de buse largje dîs metris che si è vierte tor des cuatri di gnot inte vie Cadorna, tal centri di Gurize. Sul puest a son rivâts daurman i Vigjii dal fûc che a àn controlât che nissun si fos fat mâl e che no si fossin rotis lis condotis. (a.d.g.) – 03.10.2024
