Udin, citât blindade pe partide cuintri Israêl

Une citât blindade, cuntune “zone rosse” che e cengle dut il stadi. Udin e je cussì di domenie, in spiete de partide di balon de Italie cuintri Israêl, valide pe Nations League, che si fasarà lunis di sere aes 8.45. I controi par rivâ li dal stadi a son compagns di chei di une zone se no in vuere, almancul in pericul: percuisizions personâls, viertidure di borsis e russacs, cjans specializâts a “nasâ” lis bombis…. Il stadi al è stât cenglât e sierât di altris bandinelis, di là di chês che za a jerin, ancje se i biliets vendûts a son mancul de metât dai puescj dentri dal Bluenergy Stadium. Lis scuadris des dôs nazionâls a son in doi albiercs a Buri e a Udin, acompagnadis di agjents di polizie e no dome. E je tension ancje pe manifestazion a pro de Palestine, che si fasarà intal centri di Udin tal dopomisdì: dut câs, il corteu nol podarà nancje svicinâsi ae zone dal stadi. La citât si è sveade ancje cuntun pâr di scritis cun acusis di “complicitât intal gjenocidi” aes aministrazions: tai mûrs de sede de Regjon Friûl-Vignesie Julie di vie Sabbadini e devant de jentrade dal Municipi di Udin. (A.I.) – 14.10.2024