Udin e il Messic adun par un progjet su Tina Modotti

Fotografe, atore, artiste, ma soredut ativiste pai dirits des feminis e dai lavoradôrs. In graciis dai siei talents poliedrics, la udinese Tina Modotti e je stade une icone intai agns ’20, in Italie ma soredut in Messic, dulà che la sô figure si lee cu la storie di altris doi artiscj famôs, Frida Kahlo e Diego Rivera. Trop che la celebritât de Modotti e sedi ancjemò une realtât contemporanie, lu dimostre la visite in citât dal Ambassadôr dal Messic a Rome, Carlos Garcìa da Alba, che al è stât a viodi la cjase di nassite di Tina Modotti in Praclûs. L’incuintri cul diplomatic al è servît par meti lis fondis par une future colaborazion, ispirade al percors de artiste di Udin. (A.I.) – 29.08.2023