La citât di Udin e vai pe muart di Shimpei Tominaga, il gjaponês di 56 agns cjapât di un pugn in muse dopo che al veve cirût di difindi un zovin di une agression. Îr sot sere al è finît il periodi di osservazion su lis cundizions dal puar om e la comission e à declarât la muart cerebrâl.
Intant e devente plui grivie la posizion di Samuele Battisella, il zovin di 19 agns che in vie delle Pelliccerie, vie pe gnot di vinars ai 21 di Jugn al veve fat colâ indaûr il puar om che al à batût il cjâf cuintri di un cjanton dal marcjepît. Cumò la acuse pal fantat no je plui di lesions ingriviadis, ma di omicidi preterintenzionâl, come che al à visat il procuradôr de Republiche Massimo Lia. Tominaga, che al faseve l’imprenditôr e al viveve di agns a Udin, al diseve simpri di jessi il prin tifôs gjaponês a vê l’abonament inte curve Nord dal stadi e al jere une vore preseât in citât. (a.d.g.) – 26.06.2024
