Ancjemò un arest par droghe a Gurize, il cuart in pôc plui di un mês. L’ultin episodi al rivuarde un spaçadôr cjatât in possès di droghe e dai struments par preparâ lis dosis. Cun se al veve 111 grams di eroine, un gram di cocaine, doi belancins di precision, un rodul di cjarte stagnole e un “grinder” (machinute par fruçonâ marihuana). Al è un sloven di 36 agns, percuisît de Polizie dopo che cierts citadins lu vevin viodût zirâ cun ande suspiete dentri de lôr cort condominiâl. La ispezion domiciliâr fate subit dopo, cun di plui, e à permetût di cjatâ altris sacuts di plastiche che a conteginvin marihuana par plui o mancul 2 grams complessîfs.
Chest al è il cuart arest in pôc plui di un mês fat de Cuesture di Gurize par violazions de normative sui stupefacents; ai 5 di Setembar e ai 19 di Setembar, di fat, personâl de Scuadre volante al veve arestât un gurizan di 18 agns e un pakistan di 33 agns cjatâts in maniere rispetive in possès di 600 e 100 grams di hashish, intant che ai 8 di Setembar la Scuadre mobile, ae fin di une ativitât di investigazion delegade de Procure de Republiche di Gurize, e veve arestât un citadin sloven di 48 agns, secuestrant inte sô abitazion 21 plantis di cannabis e 160 grams di marihuana. (a.d.g.) – 17.10.23
