Ancjemò un at vandalic cuintri di un rilevadôr di velocitât dilunc de strade Pontebane. Il fat al è sucedût tal teritori dal Comun di Codroip, indulà che vie pe gnot di îr al è stât taiât il pâl che al puartave il rilevadôr e i machinaris eletronics par misurâ la velocitât dai veicui, intun toc di strade indulà che il limit al è di 90 chilometris oraris. I agjents de Polizie locâl a àn cjatât il pâl fat a tocs e i machinaris par tiere. Dal sabotaç a son stâts informâts ancje i carabinîrs, rivâts sul puest par fâ i rilêfs e par cjatâ il colpevul di chest at vandalic.
Magari cussì no, nol è il prin câs di autovelox tirât jù tal Friûl di Mieç. Ai 14 di Dicembar dal an passât, simpri doprant une smeriliadore (tancj le clamin flex, ndr) al jere stât fiscât il rilevadôr fis dilunc de strade Ferrata (Sp 95), tra il Comun di Bertiûl e chel di Vildivar. (a.d.g.) – 10.02.2025
