I volontaris di Protezion Civîl dal Comun di Grau a son jentrâts in azion cheste matine a supuart, visâts de Cjapitanarie di Puart, pal spandiment di sostancis incuinantis intal puart Mandracchio, ae altece dal marcjât itic. La scuadre e je daûr a lavorâ par meti des barieris par assorbî la sostance oleose, componude si presum di idrocarbûrs.
Un altri spandiment al veve domandât l’intervent de Protezion Civîl, simpri intal puart Mandracchio, doi dîs indaûr. Ancje in chel câs l’avîs al jere rivât de Vuardie Costiere.
Al pâr jessi comedât, invezit, il probleme di incuinament dilunc il flum Flum, a Pasian di Pordenon, ae altece dai Mulins, inte zone daûr dal Municipi.
Une lacje oleose e jere stade segnalade îr di un citadin che al veve alertât lis Vuardiis dal fûc e i volontaris de Protezion civîl. Chescj ultins si son dâts daurman di fâ, su domande dai pompîrs, par meti une bariere assorbente in mût di contignî il spandiment, ancje in chest câs si pense di idrocarbûrs. La bariere e restarà in azion fintremai a cheste sere. Sul puest ancje il personâl de Arpe pes analisis. (A.D.G.) – 6.02.2023
