I financîrs dal Comant provinciâl di Pordenon a àn intensificât i controi intes campagnis di Vivâr, par verificâ la posizion dai lavoradôrs impleâts intes aziendis agriculis.
Intal cors di une verifiche li di une ativitât gjestide di un imprenditôr di origjin moldave, i militârs, supuartâts di un elicotar de Sezion Aerie de Vuardie di Finance di Vignesie, a àn individuât un citadin albanês che al veve dome il vist turistic, che nol permet di lavorâ.
Pal rapresentant de societât e il lavoradôr e je stade fate la segnalazion ae autoritât judiziarie par violazion des normis su la imigrazion; pal imprenditôr, cun di plui, e je stade domandade al Ispetorât dal Lavôr un proviodiment di sospension de ativitât.
I controi si incuadrin inte azion di tutele dal tiessût economic, inte suaze de colaborazion tra la Vuardie di Pordenon e lis articolazions locâls di Coldiretti e Confagricoltura. (A.D.G.) – 10.02.2023
