Un autobus e siet machinis cjapâts dentri di un incident a Triest

Tor des trê e mieze dal dopomisdì di vuê un autobus e siet machinis a son stâts cjapâts dentri di un incident dilunc vie Flavia a Triest. Su lis causis dal fat a stan investigant lis fuarcis dal ordin, ancje parcè che a son stâts nûf ferîts.

Sul puest a son rivâts i Vigjii dal fûc cun dôs scuadris che a àn lavorât, adun cul personâl sanitari, par tirâ fûr une persone restade blocade dentri di une machine fruçade.

Ae fin simpri i pompîrs a àn lavorât par meti in sigurece ducj i mieçs e par liberâ la strade. (a.d.g.) – 18.03.2025