Al è stât cjatât un câs di virus West Nile a Cjons. Lu à dit la Aziende sanitarie dal Friûl Ocidentâl, che e à cjatât la malatie intune femine indenant cui agns, ricoverade di cualchi zornade intal repart di neurologjie par fiere compagnade di problemis neurologjics. “Lis cundizions gjenerâls de persone ricoverade – a fasin savê intune note chei de Asfo – a son griviis e la prognosi e je par cumò risiervade”.
La femine, residente in provincie di Pordenon, no à contât di jessi stade di altris bandis e par chest si pense che il virus lu vedi cjapât propit a cjase. Subite daspò de segnalazion, a son tacâts daurman ducj i aciertaments de bande dal Dipartiment di prevenzion di Asfo. Ai 17 di Lui e je stade decidude dal Iss – Centro nazionale trapianti – l’inviament di misuris di control e di prevenzion su la pussibilitât di trasmeti la malatie midiant il traplant par ducj i residents de nestre regjon. (a.d.g.) – 18.07.2024
