Intervent pardabon dificil vuê di buinore dongje Val di Lama, intal comun di Budoie, indulà che un cjaçadôr e il so cjan a son stâts judâts dai Vigjii dal fûc di Pordenon.
Dilunc di une batude di cjace il cjan, intant che al coreve daûr dai salvadis, al jere sbrissât jù par un sdrup a plui o mancul 1.200 metris di cuote e li al jere restât blocât. Il paron lu veve cjatât, ma pendence e scûr no i vevin permetût di judâ la bestie e cussì al è tornât il dì dopo cuntun amì. Il cjaçadôr al è rivât li dal cjan ma dopo nol rivave plui a tornâ indaûr.
Sul puest a son cussì rivâts i tecnics dal nucli Speleo alpin fluviâl che si cjatave inte zone par un adestrament. Daspò une ore di cjaminade su la nêf, i socoridôrs a son rivâts li dal om e dal so cjan e ju àn judâts a tornâ a cjase. (a.d.g.) – 09.12.2024
