Un fulmin al à fat cjapâ fûc al cuviert di une abitazion a Denemonç îr di sere, aes 10 e mieze, cuant che a son intervignudis diviersis scuadris des Vuardiis dal fûc adun cun personâl sanitari e ai Carabinîrs di Vile di Cjargne. Il fugaron al veve intacât il cuviert de cjase, che al è lât par buine part disfat.
Inte abitazion, su trê plans, in chel moment a jerin dôs feminis di 84 e 82 agns. Dutis dôs, par fortune, a son rivadis a lâ fûr in timp cence fasi mâl. A son stadis visitadis sul puest dal personâl infermieristic.
I pompîrs a àn rivât a evitâ che lis flamis e tacassin il cuviert de cjase dongje. Distudât il fûc, lis Vuardiis dal fûc a àn proviodût ae bonifiche e ae metude in sigurece. Lis operazions a son finidis a dute gnot. (A.D.G.) – 06.07.2023
