Un milion de Regjon pai afrescs e lis anconis intai paîs

Cuasi un milion di euros stanziâts de Regjon F-Vj par rimeti a gnûf lis testemoneancis de art religjose intes citâts ma soredut intai paîs e intes campagnis. “Afrescs e capitei” al è il non de iniziative pensade pal recupar, la conservazion e la valorizazion di edificis di presi artistic e architetonic traviers la difese propit dai lôr afrescs, cuntun contribût ancje pal restaur di capitei, ediculis, anconis e crucifìs presints intes viis publichis. Pal recupar dai afrescs, la Regjon e à stanziât za 675 mil euros destinâts a 27 Comuns (25 mil euros par ognidun), che a rivin a 915 mil tignint cont dai 240 mil destinâts pe restaurazion di capitei votîfs e anconis che a caraterizin a fuart i paîs e lis areis di campagne dal nestri teritori. “Une iniziative impuartante, uniche in Italie – al à sclarît l’assessôr regjonâl ae Culture Mario Anzil , che al à presentât il progjet adun cul conseîr regjonâl Markus Maurmair e il diretôr dal segretariât regjonâl dal Ministeri de Culture pal Friûl-Vignesie Julie, Andrea Pessina – pal mantigniment de memorie. E ancje pe valorizazion dai abitâts, che cussì si tornin a imparonâ di une part significative de proprie identitât”. (A.I.) – 27.01.2025