Un Nobel pe pâs a Udin e a Pordenon

Dopli apontament in Friûl-Vignesie Julie par Irina Scherbakova, cofondadore de Ong russe“Memorial”, che e je stade premiade cul Nobel pe pâs tal 2022. Une personalitât di riferiment par rifleti suntun teme cetant atuâl: chel de involuzion dal sisteme autoritari in Russie, prime e dilunc de vuere in Ucraine. La iniziative e je promovude de associazion Friuli Storia, in colaborazion cun Memorial Italia e altris realtâts culturâls de regjon, pe direzion sientifiche di Tommaso Piffer. Si tache sabide ai 16 aes 4 dopomisdì intal Centri de Madone des Graciis di Zardin grant, a Udin. Domenie ai 17 Irina Scherbakova, che di cuant e je tacade la vuere in Ucraine e je lade a stâ in Gjermanie, si movarà a “pordenonelegge” pe zornade che e siere la Fieste dal libri cui autôrs, aes 10 di matine, intal Auditorium de scuele “Vendramini”. (A.I.) – 14.09.2023