Secuestrât dai financîrs dal Comant Provinciâl di Udin un grues cuantitatîf di droghe. La operazion si è fate vie pe gnot: tor la une, dongje il casel autostradâl di Ugovize, intal Comun di Malborghet-Valbrune, lis Flamis Zalis de Compagnie di Tarvis, dilunc dal control di un veicul comerciâl cun targhe polache diret intal Centri Italie, a àn cjatât une cjame di infloressencis di cannabis sativa, risultade dopo jessi marihuana cul esam fat cun reagjents specifics.
In dut a son stâts secuestrâts 195,68 chilograms di droghe, imbustade in 176 confezions sot vueit par sconzurâ il spandiment di eventuâi odôrs individuabii dai cjans antidroghe e traspuartât in pacs anonims, acompagnâts di documents di traspuart scrits in mût di no imagjinâ il contignût. La marihuana secuestrade, se rivendude intal teritori nazionâl, e varès podût butâ jentradis ilecitis fin a 2 milions di euros. L’autist de machine, un citadin polac di 53 agns, al è stât arestât dai financîrs. Lis altris investigazions fatis dai militârs a àn permetût di ricostruî il percors presumût fat de droghe, inviade de Svuizare ae Republiche Ceche e, di li, tornade a mandâ di gnûf in direzion de Italie. (a.d.g.) – 14.11.2023
