I financîrs di Palme a àn secuestrât tai dîs passâts une tonelade di vueli lubrificant cjatât inte aree di Gonârs dilunc de autostrade A4 dentri di un camion che al rivave de Romanie.
La cjame, che e valeve sul marcjât passe 15 mil euros, e jere destinade a une societât de Campanie che e lavore tal cumierç di prodots pe auto, ma che no podeve tignî dute cheste cuantitât di vueli. Cun di plui, par chê cjame no jerin stadis paiadis lis tassis e vendidôr e compradôr a son stâts denunziâts cu la confische de cjame.
In acuardi cu la Procure di Udin la Vuardie di finance e à decidût di regalâ il prodot ae Protezion civîl par podêlu doprâ pes sôs ativitâts. La consegne e je stade fate tra la Vuardie di finance rapresentade dal comandant provinciâl Corrado Loero e la Protezion civîl ae presince dal assessôr regjonâl Riccardo Riccardi e dal diretôr Amedeo Aristei. (a.d.g.) – 23.10.2024
