Universitât dal Friûl: une sale par pre Di Piazza

La Universitât dal Friûl e à decidût di dedicâ la sale di studi de sô Biblioteche sientifiche e tecnologjiche a pre Pierluigi Di Piazza, il fondadôr dal Centri “Ernesto Balducci” di Çuian, muart ai 15 di Mai di doi agns indaûr. Un om che tal 2006 al veve za vût la lauree honoris causa tant che “Imprenditôr di solidarietât”. La cerimonie e tacarà cu la scree dal panel che al dediche la sale al predi di Tualiis. L’event al larà indevant tal auditorium de Biblioteche cu la proiezion di un toc curt dal cine documentari dal 2016 “I volti spirituali del Friuli” (Lis musis spirituâls dal Friûl), cu la regjie di Marco D’Agostini. Po dopo, a son previodûts i intervents di Roberto Pinton, Marina Brollo, Vito Di Piazza, Paolo Mosanghini, pre Luigi Ciotti e dal filosof Massimo Cacciari. (A.I.) – 22.04.2024