Dome intai prins 6 mês dal an inte nestre regjon si son dopleâts i câs di Dengue, deventâts 10. La evoluzion de situazion e la presince de variant grivie clamade “Dengue emoragjiche” a àn sburtât la Zonte regjonâl a aprovâ la soministrazion a gratis de vacine cuintri de Dengue par cui che al vîf in Friûl-Vignesie Julie.
Simpri su propueste dal assessôr ae Salût Riccardo Riccardi, la Zonte e à aprovât la campagne di vacinazion a gratis cuintri dal virus respiratori sinciziâl (Rsv) ai piçui fin dai prins 6 mês di vite. Il protocol al previôt ancje che ducj i frutins a sedin imunizâts prime di jessi dal repart di maternitât dilunc de stagjon epidemiche, ven a stâi dai 30 di Setembar di chest an ai 31 di Març dal 2025. Cheste profilassi si podarà fâ ancje ai piçui sot dai doi agns che a vedin fatôrs di risi come malatiis respiratoriis griviis o fibrosi cistiche. (a.d.g.) – 23.08.2024
